اتوار 9 فروری 2025, 8:31 شام
کراچی کے نوجوان کی محبت میں گرفتارہوکر امریکا سے آنےوالی امریکی خاتون اونیجا اینڈریو رابنسن کے لیے سماجی کارکن رمضان چھیپا نے ویڈیو پیغام جاری کردیا ۔ فوٹو اینڈ ویڈیو شیئرنگ پلیٹ فارم انسٹاگرام پر 2 مختلف ویڈیوز شیئر کرتے ہوئے سماجی کارکن نے اونیجا کی وطن واپسی پر خوشی کا اظہار کیا ہے،انہوں نے کہا کہ مجھے بےحد خوشی ہے کہ اونیجا خیریت کے ساتھ وطن واپس چلی گئی ہیں۔
انہوں نے کہا کہ جب اونیجا کو پاکستان میں مشکلات کا سامنا کرنا پڑا تو میرا ان سے رابطہ اس وقت ہوا جب انہیں چھیپا سینٹر لایا گیا، انسانی ہمدردی کے تحت جتنی مہمان نوازی ہم کرسکتے تھے ہم نے کی،ہمیں خوشی اور فخر ہے کہ انہوں نے ہمارے ساتھ وقت گزارا اور ہمیں خدمت کا موقع فراہم کیا۔ رمضان چھیپا نے کہا کہ ہم نے اپنی بھرپور مہمان نوازی سے پاکستانی عوام کی نمائندگی کی اور بتایا کہ ہم اچھے اور انسانیت کے علم بردار ہیں، انسانیت کی خاطر انہیں ہر ممکن طریقے سے تعاون اور مدد کرنے کی کوشش کی۔
سماجی کارکن کے مطابق پریس کانفرنس میں امریکی خاتون کی ذہنی کیفیت کا اندازہ ہوگیا تھا، علاج کے لیے اونیجا کچھ وقت ہسپتال میں بھی زیرِ علاج رہیں،الحمد للّٰہ اب وہ خیریت سے گھر واپس چلی گئی ہیں تو مجھے بہت خوشی ہے، میری دعائیں اور نیک تمنائیں ان کے ساتھ ہیں۔
