کراچی: ایم کیو ایم پاکستان کےمرکزی رہنما ڈاکٹر فاروق ستار نے مطالبہ کیا ہے کہ حکومت، انتظامیہ ڈمپرز کے خلاف کارروائی کریں۔
نجی ٹی وی کے مطابق کراچی میں سینئر صوبائی وزیر شرجیل میمن کے ہمراہ پریس کانفرنس کرتے ہوئے فاروق ستار کا کہنا تھا کہ شہریوں سے اپیل ہے کہ وہ انصاف کے لیے متعلقہ فورمز سے رابطہ کریں۔انہوں نے کہا کہ حکومت، انتظامیہ اور قانون نافذ کرنے والوں کی بھی ذمے داری ہے کہ دن میں ڈمپرز اور کنٹینرز کے سبب جہاں حادثات ہو رہے ہوں وہاں فوری کارروائی ہو اور متاثرین اور لواحقین کو انصاف ملنا چاہیے، ایسے حادثات کی روک تھام کے لئے ٹھوس اقدامات کئے جائیں۔
ڈاکٹر فاروق ستار کا اس حوالے سے ایک کمیشن بنائے جانے کی ضرورت پر بھی زور دیتے ہوئے کہنا تھا کہ یہ حادثات لسانی نہیں اور نہ ہی انہیں لسانی معاملہ بننا چاہئے جبکہ تشدد اور جلاو¿ گھیراو¿ کے واقعات مناسب نہیں ہیں۔
سندھ کے سینئر وزیر شرجیل میمن نے کراچی میں ٹریفک حادثات اور ان کے نتیجے میں قیمتی جانیں ضائع ہونے پر تشویش کا اظہار کرتے ہوئے کہا ہے کہ تمام سٹیک ہولڈرز نے اس بات پر اتفاق کیا ہے کہ ایسے حادثات کو لسانی یا سیاسی رنگ نہ دیا جائے۔
ان کا کہنا تھا کہ آج کی ملاقات کے بعد یہ واضح پیغام جائے گا کہ ہم سب ایک ہیں اور پاکستانی ہیں، آج تمام سیاسی جماعتوں کا تفصیلی اجلاس ہوا جس میں ٹرانسپورٹرز کے نمائندوں نے بھی شرکت کی۔
سینئر صوبائی وزیر شرجیل میمن نے کہا کہ حادثات نہیں ہونے چاہئیں اور اگر کوئی حادثہ ہوتا بھی ہے تو اسے لسانی، سیاسی یا کسی اور قسم کا رنگ نہیں دیا جائے گا جس پر اس شہر کے تمام سٹیک ہولڈر نے اتفاق کیا ہے۔ان کا مزید کہنا تھا کہ ہم مسائل کو حل کرنا چاہتے ہیں اور کراچی کا امن وامان برقرار رکھنے کے لئے کوشاں ہیں جبکہ گزشتہ روز حادثے کے ذمے دار ٹینکر ڈرائیور کو گرفتار کرلیا گیا ہے اور جلاو¿ گھیرائو کرنے والے 15 افراد کو بھی گرفتار کیا گیا ہے۔
