کراچی: پشتونخوا ملی عوامی پارٹی اور تحریک تحفظ آئین پاکستان کے رہنما محمود خان اچکزئی نے کہا ہے کہ ملک غلط حکمرانوں کے ہاتھ میں آ کر بحران میں گھرا ہوا ہے۔
سلمان اکرم راجہ،صاحبزادہ حامد رضا، اسد قیصر،سردارلطیف کھوسہ کے ہمراہ میڈیا سے گفتگو کرتے ہوئے انہوں نے کہا کہ پاکستان ایک ترقی پذیر ملک تھا، غلط حکمرانوں کے ہاتھ آگیا۔
محمود خان اچکزئی کا کہنا تھا کہ سب کچھ آئین کے مطابق ہوگا، تب ہی پاکستان ترقی کی طرف آسکتا ہے، دیر سے آئے درست آئے، ہم سب ایک پلیٹ فارم پر آگئے ہیں۔
انہوں نے کہا کہ جب تک آئین کی بالادستی نہیں ہوگی ملک نہیں چل سکتا، 20 کروڑ روپے لے کر پارلیمنٹ میں بھیجا جاتا ہے، آج پاکستان میں جو آدمی اپنا ضمیر بیچ دیتا ہے وہ وفادار ہے۔
محمود خان اچکزئی نے کہا کہ جو سچ بولتا ہے، جھوٹ بولنے سے منع کرتا ہے وہ غدار ہے، پورا ملک جانتا ہے انتخابات پی ٹی آئی جیت چکی ہے۔
اس موقع پر پاکستان تحریک انصاف کے مرکزی رہنما سلمان اکرم راجہ نے خطاب کرتے ہوئے کہا کہ ملک میں آئین کی حکمرانی چاہتے ہیں۔ اقلیتوں کو حقوق حاصل ہیں، ہم سب کےحقوق یکساں ہیں، ہم سب نے اپنےحقوق کے لیے اکٹھے لڑنا ہے۔
انہوں نے کہا کہ پاکستان کی عوام کو جمہوریت اورحقوق چاہئیں، عوام چاہتےہیں ان کے ووٹ کی عزت ہو، جمہوریت کےعلاوہ پاکستان کا اور کوئی مستقبل نہیں۔
سیکریٹری جنرل پی ٹی آئی کا کہنا تھا کہ عمران خان نے خط کے ذریعے اداروں اور قوم کے ضمیر کو جھنجھوڑا ہے، وہ خط کےذریعے کوئی ریلیف نہیں مانگ رہے، بانی اداروں کو کہہ رہے ہیں، آئین کی پاسداری کرو، تمام اداروں نے اپنی حدود میں رہ کر کام کرنا ہے۔
سلمان اکرم راجہ کا نے کہا کہ یہ پارلیمان عوام کی نمائندہ نہیں ہے، وفاق کی جانب سےصوبوں کو ان کے حقوق نہیں دیئےجا رہے ہیں۔
رہنما تحریک انصاف سردار لطیف کھوسہ نے کہا کہ 26 نومبر کو نہتےمظاہرین پر گولیاں چلائی گئیں، وزیراعظم شہباز شریف، وزیرداخلہ،خواجہ آصف،آئی جی پنجاب ذمہ دار ہے، یہ فسطایئت کا دور ہے، ملک کو بےآئین سرزمین بنا دیا گیا ہے، پیکا ایکٹ کومسترد کرتے ہیں۔
انہوں نے کہا کہ بانی نے بھی اسی لیے چیف جسٹس کو خط لکھا ہے ، چیف جسٹس نےکہا عمران کےخط کوآئینی بینچ کو بھیج دیا ہے۔
صاحبزادہ حامد رضا
چیئرمین سنی اتحاد کونسل صاحبزادہ حامد رضا کا کہنا تھا کہ 26نومبرکی ہمیں سی سی ٹی وی فوٹیج نہیں دی گئیں، یہ ڈھٹائی کےساتھ جھوٹ بولتے ہیں، پاکستان کے آئین میں تمام بانی نےوہی خط چیف جسٹس آف پاکستان کوبھی بھیجا ہے۔
رہنما تحریک انصاف اسد قیصر نے کہا کہ ہماری حکومت میں ایک ڈرون حملہ نہیں ہوا تھا اور افغانستان کے ساتھ دوستانہ تعلقات تھے، خیبرپختونخوا کا مسئلہ امن وامان نہیں غلط فارن پالیسی کی وجہ سے ہے، تحریک انصاف کی حکومت نےافغانستان کے ساتھ تجارت کو فروغ دیا۔
