آرمی چیف جنرل سید عاصم منیر سے آسٹریلوی فوج کے سربراہ لیفٹیننٹ جنرل سائمن سٹورٹ نے پیر کو راولپنڈی میں ملاقات کی۔
ملاقات کے دوران دونوں رہنماؤں نے باہمی دلچسپی کے امور بالخصوص عالمی اور علاقائی سلامتی کے ماحول پر تبادلہ خیال کیا۔
جنرل سید عاصم منیر نے امن اور استحکام کے مشترکہ اہداف کو فروغ دینے میں مضبوط دوطرفہ تعلقات کی اہمیت کو نوٹ کرتے ہوئے آسٹریلیا کے ساتھ اپنے تعلقات کے لیے پاکستان کی تعریف پر زور دیا۔
دونوں اطراف نے علاقائی اور عالمی امن کے لیے جاری تعاون کی اہمیت کو تسلیم کرتے ہوئے دفاع اور سلامتی میں تعاون کو مزید مضبوط بنانے کے عزم کا اعادہ کیا۔
لیفٹیننٹ جنرل سٹورٹ نے دہشت گردی کے خلاف پاکستان کی کوششوں کو سراہا اور دونوں ممالک کے درمیان دوطرفہ دفاعی اور سیکورٹی تعاون کو مزید گہرا کرنے کے عزم کا اظہار کیا۔
قبل ازیں جی ایچ کیو پہنچنے پر آسٹریلوی آرمی چیف نے یادگار شہدا پر پھولوں کی چادر چڑھائی اور پاکستان کے شہداء کو خراج عقیدت پیش کیا۔
ان کا پرتپاک استقبال کیا گیا، پاک فوج کے چاق و چوبند دستے نے انہیں گارڈ آف آنر پیش کیا۔
