پی ٹی آئی کی احتجاج کی کال پر ن لیگ کا ردعمل آ گیا

لاہور:پی ٹی آئی کی احتجاج کی کال پر ن لیگ کا ردعمل آ گیا۔

صوبائی وزیر اطلاعات پنجاب عظمیٰ بخاری نے کہا کہ تحریک انصاف کی سیاسی پیدائش احتجاج، دھرنے اور جلسوں کی شرط پر ہوئی تھی، امپائر کی انگلی، سازشی کردار اور سہولتکاری بانی پی ٹی آئی کی سیاست کا قبلہ رہے۔

انہوں نے کہا کہ کسی کو پنجاب کا امن خراب نہیں کرنے دیں گے۔ چور چور کی گردان کرنے والے کا اپنا پورا ٹبر چوری میں رنگے ہاتھوں پکڑا گیا، اقتدار کی ہوس میں قوم کے بچوں کو جھونکنے والے کے اپنے بچے لندن میں لگژری لائف اسٹائل انجوائے کررہے ہیں۔

عظمیٰ بخاری نے کہا کہ پنجاب کی ترقی فتنہ پارٹی سے ہضم نہیں ہورہی، بانی پی ٹی آئی کی سیاسی زندگی ڈھیل اور ڈیل کے گرد گھومتے گزری ہے۔

واضع رہے پاکستان تحریک انصاف نے 24 نومبر کو احتجاج کی کال دی ہے اور واضح کیا کہ اس مرتبہ مطالبات تسلیم ہونے تک واپس نہیں جائیں گے۔ پی ٹی آئی کے سینئر رہنماؤں کے بیان کے بعد ن لیگ نے بھی خاموشی توڑ دی۔