منگل کی رات اسلام آباد میں پاکستان تحریک انصاف (پی ٹی آئی) کے مظاہرین کے خلاف ایک بڑے کریک ڈاؤن کا آغاز ہوا، جب قانون نافذ کرنے والے اداروں نے کلثوم پلازہ چوک اور بلیو ایریا سمیت اہم علاقوں کو خالی کرنے کے لیے بڑے پیمانے پر آپریشن شروع کیا۔
بتایا جاتا ہے کہ مرکزی احتجاجی قافلے میں شامل پی ٹی آئی کے تمام کارکنان منتشر ہو گئے ہیں جبکہ عمران خان کی اہلیہ بشریٰ بی بی اور وزیر اعلیٰ خیبر پختونخوا علی امین گنڈا پور ایک ہی گاڑی میں بلیو ایریا سے روانہ ہو گئے ہیں۔
قبل ازیں اطلاعات تھیں کہ بشریٰ بی بی اور گنڈا پور کی گرفتاری کا امکان ہے۔ اطلاعات کے مطابق بشریٰ بی بی اور علی امین گنڈا پور دو گھنٹے قبل کنٹینرز سے نکلے تھے جس کے بعد سے پارٹی قیادت ان سے رابطے میں نہیں ہے۔
پولیس ذرائع کے مطابق، رینجرز، اے ٹی ایس کمانڈوز، اور پنجاب اور اسلام آباد پولیس کے تقریباً 1500 اہلکاروں پر مشتمل آپریشن کے نتیجے میں پی ٹی آئی کے 500 سے زائد کارکنوں کو گرفتار کیا گیا ہے۔ سکیورٹی فورسز نے جناح ایونیو سے مظاہرین کی طرف سے ہٹائے گئے تمام کنٹینرز کو بھی بحال کر دیا ہے تاکہ ناکہ بندی بحال کی جا سکے۔
عینی شاہدین نے خیبر چوک اور کلثوم پلازہ کے درمیان شدید گولہ باری اور فائرنگ کی اطلاع دی جب پولیس نے احتجاجی علاقوں کو خالی کرنے کی طرف پیش قدمی کی۔
علاوہ ازیں کلثوم پلازہ چوک کے قریب پی ٹی آئی کے مارچ میں استعمال ہونے والے مین کنٹینر میں آگ لگ گئی۔ حکام نے ابھی تک آگ لگنے کی وجہ کا تعین نہیں کیا ہے۔
قبل ازیں شام کو رینجرز، اسلام آباد پولیس اور پنجاب پولیس نے کامیابی سے ڈی چوک اور چائنہ چوک کو پی ٹی آئی کے مظاہرین سے کلیئر کرایا۔
مشترکہ کارروائی کے نتیجے میں مظاہرین کو کلثوم پلازہ چوک اور خیبر پلازہ چوک کی طرف دھکیل دیا گیا جب کہ خالی ہونے والے علاقوں کو محفوظ بنانے کے لیے رینجرز اور پنجاب پولیس کی بھاری نفری تعینات کی گئی۔ آنسو گیس فائر کرنے کی ذمہ دار پولیس ٹیموں کو قریبی عمارتوں کی چھتوں پر تعینات کیا گیا ہے۔
بقیہ مظاہرین کو منتشر کرنے کے لیے وقفے وقفے سے آنسو گیس کی شیلنگ کی گئی جب کہ آپریشن کے دوران متعدد گرفتاریاں بھی کی گئیں۔
حکام نے بلیو ایریا اور جناح ایونیو کی ملحقہ سڑکوں پر روشنیاں بجھا دی ہیں۔
