وزیر اعظم شہباز شریف نے ترسیلات زر میں ریکارڈ اضافے اور ہفتہ وار مہنگائی کی شرح میں 3.57 فیصد تک کمی پر اطمینان کا اظہار کیا ہے۔
منگل کو اسلام آباد میں وفاقی کابینہ کے اجلاس کی صدارت کرتے ہوئے انہوں نے کہا کہ ترسیلات زر میں اضافہ سمندر پار پاکستانیوں کے اعتماد کی عکاسی کرتا ہے۔ انہوں نے کہا کہ یہ ایک مخصوص سیاسی جماعت کی طرف سے سول نافرمانی کی کال کے باوجود ہوا ہے۔
معاشی ترقی کے لیے سیاسی استحکام کی ضرورت پر زور دیتے ہوئے وزیراعظم نے امن و امان کی صورتحال پر گزشتہ روز اپنی زیر صدارت اجلاس کا حوالہ دیا۔ انہوں نے کہا کہ اس بات کو یقینی بنانے کی ہدایات دی گئی ہیں کہ حال ہی میں وفاقی دارالحکومت پر حملے کی کوشش کرنے والوں کو بخشا نہیں جائے گا، جب کہ واضح کیا کہ بے گناہ افراد کو ہاتھ نہیں لگایا جائے گا۔
وزیراعظم نے کہا کہ آذربائیجان پاکستان میں دو ارب ڈالر کی سرمایہ کاری کرے گا۔ انہوں نے بتایا کہ آذربائیجان کے سفیر نے گزشتہ روز ان سے ملاقات کے دوران اس بات پر زور دیا کہ منصوبوں کی نشاندہی کی جائے اور فزیبلٹی اسٹڈیز تیار کی جائیں تاکہ معاہدوں کو آگے بڑھایا جا سکے۔
شام کی صورتحال کا ذکر کرتے ہوئے شہباز شریف نے کہا کہ پاکستان کا سفارتی موقف اس پر غیر جانبدار ہے۔ انہوں نے کہا کہ لبنان کے وزیر اعظم سے مشاورت کے بعد شام سے بیروت کے راستے تقریباً پانچ سو سے چھ سو پاکستانیوں کے محفوظ انخلاء کے لیے ایک طریقہ کار وضع کیا گیا ہے۔
(ٹیگس سے ترجمہ) وزیر اعظم
